Katër mijë qytetarë u dënuan, u arrestuan dhe u ndaluan gjatë muajve të pandemisë për shkak të shkeljeve të masave kryesisht vendimet për kufizimin e lëvizjes të marra nga qeveria Kurti dhe Hoti.

Por pas një mendimi juridik të Gjykatës Supreme gjithë këta qytetarë nuk do të mund të ndiqen penalisht. Kjo pasi vendimet e tilla janë vlerësuar në kundërshtim me Kushtetutën. Madje, ekspertët ligjorë thonë se këta qytetarë mund të kërkojnë edhe dëmshpërblim.

Të gjitha ata që nuk respektuan vendimin për kufizimin e lëvizjes gjatë muajve të pandemisë nuk do të ndiqen penalisht.

Mendimi i Gjykatës Supreme nga Instituti i Kosovës për Drejtësi po vlerësohet i vonshëm.

Sipas Ehat Miftarajt, qytetarët e arrestuar për shkeljen e masave mund të kërkojnë dëmshpërblim nga shteti.

Kryetari i Gjykatës Supreme Enver Peci, e mohon se vendimi ka qenë i vonshëm. Sipas tij, posa kanë marrë shkresat nga gjykatat ata kanë vepruar.

Fillimisht një vendim për kufizim të lëvizjes ishte marrë nga qeveria Kurti më 23 mars, ku qytetarëve u ndalohej lëvizja nga ora 10:00 deri në 16:00 dhe nga ora 20:00 deri në 06:00 të mëngjesit.

Një vendim të tillë mori edhe qeveria Hoti në muajin korrik kur në disa komuna kufizoi lëvizjen e qytetarëve nga ora 21:00 deri në 05:00 të mëngjesit./RTK