Një peticion me 3 mijë nënshkrime për lirimin e ish-kryeministrit të Kosovës Ramush Haradinaj është dorëzuar sot tek ambasada e Francës në Prishtinë.

Peticioni me nënshkrimet e 3 mijë studentëve është dorëzuar nga “Demokracia Studentore’’ e cila edhe ka qenë organizatore e mbledhjes së këtyre nënshkrimeve.

Sipas organizatorëve peticioni është bërë me qëllim për t’i mbrojtur vlerat e Ushtrisë Çlirimtare të Kosovës.

Kryetari i organizatës “ Demokracia Studentore” Mexhid Ramusa pas dorëzimit të peticionit tha se studentët e Kosovës e kanë obligim moral t’i mbrojnë vlerat e luftës dhe të Ushtrisë Çlirimtare të Kosovës, prandaj edhe e kanë marrë iniciativën për këtë peticion.

‘’Për arsye të mbrojtjes së vlerave të Ushtrisë Çlirimtare të Kosovës, organizata ‘Demokracia Studentore’ me anë të këtij peticioni kërkon nga ambasada e Francës në Kosovë që të bëjë përpjekje për lirimin e ish-komandantit të UÇK-së Ramush Haradinaj, i cili mbahet padrejtësisht nën arrest nga autoritetet franceze. Ne studentët e Republikës së Kosovës e kemi obligim moral t’i mbrojmë vlerat e luftës dhe vlerat e UÇK-së , kështu që në këtë peticion kanë marr pjesë rreth 2500-3000 nënshkrime për arsye së ka qenë koha shumë e shkurtër’’, tha Ramusa.

Ramusa gjithashtu shtoi se zyrtarët e ambasadës së Francës e kanë pranuar peticionin duke iu thënë siç tha ai “do të bëjnë përpjekje për lirimin e Haradinajt.

Ish-komandanti i UCK-së për Zonën e Dukagjinit Ramush Haradinaj po mbahet në Francë me kusht pasi që më 4 janar ishte arrestuar nga policia franceze në bazë të një fletarresti lëshuar nga Serbia.

Shteti serb e akuzon Haradinajn për krime lufte. Më 2 mars Gjykata në Colmar të Francës do të marr vendim lidhur me kërkesën e Serbisë për ekstradim të Ramush Haradinajt.