Kryeministri i Kosovës ka kërkuar nga Ministria e Financave që në koordinim me Fondin Monetar Ndërkombëtar të propozojë mundësi të rritjes së pagave për shërbyesit civil, në sektorin e arsimit dhe në shëndetësi, shkruan arbresh.info

Por kjo gjë shihet e pamundur nga analistë politikë e njohës të ekonomisë në vend.

Sipas tyre deklarata e kryeministrit është deklaratë parazgjedhore dhe premtuese me qëllim që të përfitojë vota.

Analisti politik Donik Sallova tha se kjo deklaratë në këto rrethana është pjesë e fushatës së pa shpallur zgjedhore.

“Po besoj që pavarësisht që Ministria e Financave ka realizuar një farë stabiliteti fiskal, kjo deklaratë në këto moment është pjesë e fushatës së pa shpallur zgjedhore. Besoj shkuarja në zgjedhje do jetë e vështirë për Mustafën, sepse nuk e di cila do ishte parulla e LDK-së në këto zgjedhje, hyrja e se cilës ne koalicion me PDK-ne ka thyer të gjitha parimet dhe premtimet e fushatës se kaluar zgjedhore”, tha Sallova për arbresh.info.

E eksperti i ekonomisë Musa Limani në një prononcim për arbresh.info tha se me këtë buxhet nuk ka mundësi të rritjeve të pagave.

“Duke u bazuar në vlerën buxhetore këtë vit, del se nuk ka mundësi që të vijë deri të rritja e pagave për arsye se mjetet buxhetore janë të përkufizuara për këtë vit”.

Ai theksoi se deklarata e kryeministrit paralajmëron zgjedhje të reja.

“Prandaj deklaratat e kryeministrit se do të rriten pagat në shëndetësi e arsim mendoj se paralajmëron zgjedhjet e parakohshme, dhe e konsideroj deklaratë parazgjedhore dhe premtuese me qëllim që të përfitojë votat e votuesve”./Arbresh.info