Me kërkesë të prokurores speciale Drita Hajdari, është shtyrë gjykimi ndaj ish-rektorit të Universitetit të Prishtinës (UP), Enver Hasani, i caktuar të vazhdonte të premten.

Prokurorja Hajdari, javën e kaluar e kishte njoftuar gjykatën se e njëjta do të jetë pjesëmarrëse në një trajnim, dhe nuk do të mund të prezantoj në këtë seancë.

Përveç Hasanit, aktakuza e Prokurorisë Speciale të Republikës së Kosovës (PSRK) përfshinë edhe Haki Veliun, ish-shef i zyrës së prokurimit në UP dhe Albert Rakipin, drejtor i Institutit për Studime Ndërkombëtare nga Tirana (ISN). Të njëjtit pretendohet se në bashkëkryerje kanë kryer veprën penale të “mashtrimit në detyrë”.

Ndërsa, i kontaktuar nga Betimi për Drejtësi, mbrojtësi i të akuzuarit Rakipi, avokati Gazmend Nushi, bëri të ditur se seanca e radhës pritet të mbahet më 25 korrik 2017, në ora 10:00.

Ndryshe në seancën e cila pritej të mbahej sot, do të vazhdohej me mbrojtjen e të akuzuarit Rakipi. Përderisa në seancën e mbajtur më 8 maj 2017, Hasani kishte vendosur të mbrohej në heshtje, ndërsa Veliu kishte paraqitur mbrojtjen e tij para gjykatës.

PSRK pretendon se Enver Hasani, Veliu dhe Rakipi, me qëllim të përfitimit të kundërligjshëm pasuror për këtë Institut, kishin falsifikuar kontratën origjinale lidhur me përkthimin e disa librave nga gjuha angleze në atë shqipe. Sipas aktakuzës, të njëjtit kishin hartuar edhe një kontratë të re, duke shfrytëzuar numrin e njëjtë të protokollit dhe datën e njëjtë të kontratës origjinale. Të akuzuarit e lartpërmendur kanë ndryshuar nenin 17 të kontratës, ashtu që në vend të çmimit 12.65 për 1000 fjalë kanë shënuar çmimin e njëjtë për 1000 karaktere. Në këtë mënyrë i kanë mundësuar ISN-së, përfitim kundërligjor në shumën prej 70.426.90 euro.

Këtë kontratë, për të cilën prokuroria pretendon se është falsifikuar, i akuzuari Hasani e ka dërguar në Tiranë tek i akuzuari Rakipi, ku ky i fundit e ka nënshkruar dhe e ka vulosur në emër të ISN-së.

Tutje, në aktakuzë thuhet se Rakipi, duke shfrytëzuar kontratën e falsifikuar, ka dorëzuar në UP, faturën për përkthimin e librave të llogaritur sipas njësisë matëse “karaktere” në shumë të përgjithshme prej 87.541.80 euro, pagesë kjo e lejuar nga i akuzuari Veliu.