Kryetari i PSD-së dhe Prishtinës, Shpend Ahmeti i ka kërkuar debat publik kryetarit të VV-së, Albin Kurtit.

Ahmeti ka thënë se për gjendjen në Prishtinë, përgjegjës nuk janë drejtorët e VV-së, por lideri i saj, Albin Kurti.

“Jam i gatshëm për debat. Do të vi absolutisht s’kam çka fshehi me këtë punë. Është gjynah që VV-ja mu përfaqësu prej Egzonit, Emanit që nuk kanë qenë fare të përfshirë në qeverisje, dhe nuk e dinë fare qa do të thotë qeverisja”, tha fillimisht Ahmeti në Rubikon.

Tutje Shpend Ahmeti tha se është i gatshëm në çdo kohë për debat me Albin Kurtin.

“Albini e disa tjerë nuk e folin asnjë fjalë. E qet Bislimin me dalë me më shajt. Unë kam qenë aty dhe e di si funksionojnë. Përgjegjës janë kreu dhe rrethi i ngushtë i VV-së dhe përgjegjës jam unë. Nëse duan ballafqim dhe diskutim, kjo do të ishte mënyra më e mirë. Jam i gatshëm”, tha Ahmeti.

Kryetari i Prishtinës tha se në Vetëvendosje, vetëm Albin Kurti është i pagabueshëm.

“Njëri ka qenë i pagabueshëm, të tjerat janë të gabueshëm e debatet e tjera janë zhvilluar mes tyre. Nuk më bën kryetar më të mirë ose më të keq se a pajtohem apo jo me Albin Kurtin”, deklaroi Shpend Ahmeti.

Tutje kryetari i Prishtinës tha se nëse vazhdojnë akuzat ndaj tij nga VV-ja, atëherë do të bëjë edhe padi. /KTV/