Serbisë i përkujtohet Gjermania para fillimit të negociatave për antarësim në BE

14:42 | 17 Qershor 2015
M. A.

Më 1 korrik kryesimin e Bashkimit Evropian e merr Luksemburgu.

Shefi i diplomacisë së këtij vendi Jean Asselborn, para marrjes së këtij kryesimi, raporton B92, lidhur me fillimin e negociatave për anëtarësimin e Serbisë në BE, ka thënë se vendi i tij do të angazhohet për hapjen sa më të shpejtë të kapitujve negociues.

Por, Asselborn ka shtuar se Gjermania dhe disa vende të tjera kërkojnë përmbushjen edhe të disa çështjeve të hapura në dialogun me Kosovën.

Ndërsa parashikime për mundësinë e fillimit të negociatave BE-Serbi gjatë këtij viti ka dhënë ministri austriak i Punëve të Jashtme, Sebastian Kurz.

Ai, pas takimit me shefin e diplomacisë serbe Ivica Daçiq, njofton B92, ka theksuar se Austria e dëshiron Serbinë në BE dhe se është i nevojshëm zhvillimi pozitiv në procesin negociues.