Policia e Kosovës nuk ishte e njoftuar për hyrjen e pjesëtarëve të të ashtuquajturit “Airsoft Klub Vukovi” në veriun e vendit, gjatë muajit Janar të këtij viti.

Hulumtimi I fundit I emisionit “Udhëve” në RTK, dëshmon se persona me uniforma të Ushtrisë Serbe, kanë kryer stërvitje ushtarake në bjeshkët e Leposaviqit, në këtë fillimvit.

Zv. Drejtori I Drejtorisë Rajonale të Policisë së Kosovës në Veri të Mitrovicës, Besim Hoti, pranon se për këtë aktivitet nuk kan qenë në dijeni.

Aktivitet I ngjashëm në mallet e veriut të Kosovës ishte zhvilluar edhe Gushtin e vitit të kaluar. Kjo gjë, vazhdimisht është bërë në emër të një organizate jo-qeveritare të regjistruar ne Ministrinë e Administratës Publike, me emrin “Airsoft Klub Vukovi”.

Megjithatë, në një intervistë për emisionin “Udhëve”, drejtori I departamentit të regjistrimit të OJQ-ve në këtë ministri, Bajram Kosumi, konstaton se veprimet janë të jashtëligjshme dhe se ato nuk përkojnë me statutin e kësaj organizate.

Prandaj, ai kërkon nga Policia e Kosovës që të vijnë në këtë department me një rekomandim, gjë kjo e cila do të qonte në mbylljen e kësaj OJQ-je, e cila sic duket është keqpërdorur nga shteti dhe ushtria serbe.