Sarrazin konfirmon: Kosova e ka mbështetjen e Gjermanisë për anëtarësim në Këshillin e Evropës

12:19 | 14 Maj 2022

I dërguari gjerman për Ballkanin Perëndimor, Manuel Sarrazin i cili një ditë më parë ishte për vizitë në Kosovë konfirmoi edhe njëherë mbështetjen e Gjermanisë për anëtarësimin e Kosovës në Këshillin e Evropës.

Sarrazin një ditë më parë është takuar në Prishtinë me ministrin e Punëve të Jashtme, Donika Gërvalla.

“Qëndrimi i Gjermanisë është i qartë: Kosova është në zemër të Evropës dhe i përket Këshillit të Evropës. Dje e sigurova ministren e Jashtme të Kosovës, Donika Gërvalla Schwarz se kanë mbështetjen tonë për anëtarësim”, shkruan Sarrazin.

Sarrazin po qëndron në vizitë zyrtare në Kosovë për herë të parë pas marrjes së detyrës nga qeveria gjermane në shkurt të këtij viti.

Dje pas takimit me Gërvallen, Sarrazin në konferencë ka folur edhe për çështjen e liberalizimit të vizave, duke thënë se Gjermania e mbështet këtë proces për qytetarët e Kosovës dhe se përveç kësaj, shteti i tij po mundohet që t’i bindë partnerët e saj në BE që të heqin regjimin e vizave për Kosovën.

Ndryshe, Kosova ka marrë mbështetjen e dy shteteve të fuqishme, Gjermanisë dhe Britanisë së Madhe për anëtarësim në Këshillin e Evropës (KiE).

Lajmet më të lexuara