Samiti i Bërdo-Brijunit po zhvillohet sot në qytetin bregdetar të Durrësit, ku liderë të vendeve të rajonit po diskutojnë për thellimin e bashkëpunimit rajonal dhe sfidat e integrimit në Bashkimin Evropian.

Në fjalën e tij hapëse, Presidenti i Shqipërisë, Bajram Begaj, vlerësoi progresin e vendit në procesin e integrimit dhe bashkëpunimin rajonal, duke theksuar se zhvillimi i qëndrueshëm dhe fqinjësia e mirë janë thelbësore për paqen dhe stabilitetin në rajon.

“Të gjitha vendet e rajonit po përballen me sfida të përbashkëta si rrjedhja e trurit dhe nevoja për të mbajtur të rinjtë në vendet tona. Bashkëpunimi në fusha si kërkimi shkencor dhe novacioni është kyç për të arritur përfitimet që sjell Bashkimi Evropian,” u shpreh Presidenti Begaj.

Ai theksoi se aspirata e Shqipërisë për anëtarësim në BE nuk është vetëm një objektiv politik, por një mision kombëtar që kërkon dialog të vazhdueshëm dhe bashkëpunim rajonal.

Samiti i Bërdo-Brijunit shërben si një mekanizëm i rëndësishëm për promovimin e dialogut dhe bashkëpunimit në Ballkanin Perëndimor, me synim përshpejtimin e integrimit evropian.