Njohësi i çështjeve politike, Donik Salova ka thënë se nuk duhet të lejohet që në të ardhmen të përsëritet sjellja e ambasadorit spanjoll në NATO i cili sipas tij erdhi në Kosovë dhe fyeu popullin e Kosovës.

Ai në rrjetin social facebook ka shkruar se Spanja mund ta mohojë shtetin e Kosovës nga Madridi, e mund të lobojë kundër saj ku të dojë, në BE, në OKB e në NATO, por po erdhi në Prishtinë për çfarëdo qoftë çështjeje duhet ta dije që ky vend nuk është as krahinë e Serbisë e as nën administrim të UNMIK-ut.

Statusi i plotë:

Qeveria e Kosovës nuk duhet asesi të lejojë që në të ardhmen të përsëritet dhe të kthehet në precedent sjellja e ambasadorit spanjoll në NATO, i cili erdhi në Kosovë dhe e fyu rëndë popullin e Kosovës duke refuzuar t’i njohë autoritetet shtetërore të Kosovës. Spanja mund ta mohojë shtetin e Kosovës nga Madridi, e mund të lobojë kundër saj ku të dojë, në BE, në OKB e në NATO, por po erdhi në Prishtinë për çfarëdo qoftë çështjeje duhet ta dije që ky vend nuk është as krahinë e Serbisë e as nën administrim të UNMIK-ut, por është shtet i pavarur dhe ka një qeveri që nuk drejtohet nga persona privat, por bartës të pushtetit legjitim. Autoritetet e Serbisë ambasadori spanjoll mund t’i takojë në Beograd e jo në Prishtinë. Spanja nuk e njeh shtetin e Kosovës, as pasaportat e saj, por nuk i duhet lejuar as Spanjes, ashtu sic nuk i lejohet Gjuriqit e Vulinit të vijnë në Kosovës e ta mohojë lirinë tonë. Të tillë ambasadorë nuk na duhen në Kosovë, se ata për interes tonin nuk vijnë në Kosovë, prandaj u duhet ndaluar hyrja. Njohja duhet të jetë reciproke. Pse ta njohim këtë ambasador, kur vjen këtu për të na mohuar? Tolerimini tij mund ta përshkallëzojë sjelljen e Greqisë, Rumanisë e Sllovakisë, të cilat pavarësisht se nuk e kanë njohur formalisht shtetin e Kosovës, kanë qenë në Kosovë dhe janë takuar më autoritetet qeveritare, të vetmet autoritete që mund t’i takojë dikush për të folur për Kosovën dhe interesat e saj!