Instituti Kombëtar i Shëndetësisë Publike të Kosovës (IKSHPK) ka zhvilluar një takim me përfaqësues të Institutit të Shëndetit Publik të Shqipërisë dhe të Fondacionit “Qendra e Evropës Juglindore për Mbikëqyrjen dhe Kontrollin e Sëmundjeve Infektive” (SECID), me fokus forcimin e kapaciteteve në mbikëqyrjen e gripit dhe viruseve të tjera respiratore.

Sipas njoftimit nga IKSHPK, Delegacioni nga Shqipëria u prit nga drejtoresha ekzekutive e IKSHPK-së, Ardita Baraku, së bashku me ekipin e ekspertëve të shëndetit publik.

Në takim morën pjesë përfaqësues të lartë të fushës së epidemiologjisë, vaksinimit dhe sëmundjeve ngjitëse nga të dy vendet.

“Gjatë takimit u diskutua për situatën aktuale sa i përket gripit dhe viruseve të tjerë respiratorë në dy vendet, strategjitë dhe planet për mbikëqyrjes si dhe zbatimin projekteve EPI & Lab (Programi i Zgjeruar i Imunizimit dhe mbikëqyrja laboratorike) dhe ndikimin e tyre në kuadër të Projektit të Mbikëqyrjes së Influencës 2025–2026. Po ashtu, u trajtua pjesëmarrja në rrjetin WHO- SARI, zhvillimi i “R script” për të dhënat SARI dhe database WHO EURO, zbatimi i PIVI (partneriteti për hyrjen-implementimin e vaksinës së gripit), kapacitetet e NITAG-ut (Grupit Kombëtar Këshillëdhënës Teknik për Imunizim), mbulimi me vaksina, aktivitetet aktuale dhe nevojat për përmirësim të mëtejshëm”, thuhet në njoftim.

Në kuadër të vizitës, delegacioni nga Shqipëria vizitoi laboratorët e Departamentit të Mikrobiologjisë në IKSHPK, duke u njohur nga afër me infrastrukturën dhe proceset e punës.

Takimi u vlerësua si një hap i rëndësishëm drejt thellimit të bashkëpunimit ndërinstitucional dhe rajonal, me synim rritjen e gatishmërisë dhe reagimit ndaj kërcënimeve të shëndetit publik, në përputhje me standardet ndërkombëtare.

Tutje IKSHPK ka theksuar se mbetet i përkushtuar në forcimin e sistemeve të mbikëqyrjes së sëmundjeve ngjitëse dhe rritjen e gatishmërisë për reagim ndaj kërcënimeve të shëndetit publik.