Drejtoria e Shërbimeve Shëndetësore e Policisë së Kosovës në bashkëpunim me Qendrën e Kosovës për Transfuzionin e Gjakut ka filluar fushatën: dhurimi vullnetar i gjakut.

Ushtruesja e detyrës së drejtorit të QKKTGj-së, ka thënë se aktiviteti për dhurimin e gjakut iu ka bashkangjitur Policia çdoherë.

“Sot kemi kampin e Vrellës. Ajo që është e rëndësishme është që numri i vullnetarëve gati i të gjitha njësive ka shkuar në rritje në krahasim me vitet e kaluara. Kampi Vrella është shembull që tri herë në vit japin gjak. Këtu i falënderojmë të gjithë dhuruesit dhe bashkëpunimit në mes Policisë së Kosovës dhe qendrës për dhurimin e gjakut në ngritje të vetëdijes”, ka thënë ajo, raporton arbresh.info.

Doktoresha Merita Zogu, shef i sektorit të mjekësisë dhe promovimit të shëndetit në Drejtorinë e Shërbimeve Shëndetësore të Policisë së Kosovës ka thënë se numri i dhuruesve deri më tani është 300.

“Është aktivitet i rëndësishëm që bëhet vite me radhë në policinë e Kosovës. Prej hapjes deri më tani kemi 300 dhurues të gjakut. Presim që deri në përfundim të shtohet dukshëm numri. Kampanjë e kemi filluar nga Drejtoria e Policisë për të vazhduar në stacione. Ky gjak që dhurohet sot këtu e ka kuptimin e jetës për të gjithë ata që kanë nevojë dhe asnjëherë nuk ka munguar gatishmëria e Policisë për këtë. Ka nevojë për gjak çdoherë”, theksoi ajo.

Komandanti i Njësisë Speciale, Amir Gërguri theksoi që është ndjesi e mirë.

“Ftoi të gjithë të na bashkohen sepse është edhe për shëndet aktivitet i mirë por edhe për shpëtim jete”, tha ai./arbresh.info/