Ministrja e Ekonomisë, Artane Rizvanolli, ka njoftuar se nivelet e ujit në digën e liqenit të Ujmanit aktualisht janë ndër më të lartat.

Me anë të një postimi në Facebook, Rizvanolli tha se kjo digë qëndron stabile e aty punojnë 21 punëtorë, shkruan Arbresh.info.

“Nivelet e ujit në digën e liqenit të Ujmanit aktualisht janë ndër më të lartat me 303 milionë metra kub. Me sasinë e ujit 5 metra nën maksimum, ajo qëndron stabile e aty punojnë 21 punëtorë.

Rizvanolli në vizitën e saj ishte e shoqëruar nga zëvendësministrat Geotar Mjeku dhe Nenad Stanojević ku u mirëpritën nga Kryeshefi Faruk Mujka, ku bën të ditur se u diskutua mbi performancën e ndërmarrjes, sigurinë e digës dhe mundësitë për investime në hidrocentral dhe përgjatë kanalit.

“Aty janë vendosur pajisjet për matjen e lëvizjeve seizmike dhe për sigurinë e digës, e po punohet edhe në vendosjen e sensorëve në mënyrë që nivelet e ujit të kontrollohen edhe nga dhoma e kontrollit në Shkabaj. Niveli i rrjedhjeve në trupin e digës dhe stabiliteti i digës aktualisht kontrollohen nga galeria e cila gjendet në 90 metra thellësi”, u shpreh ajo.

“Ndërmarrja “Ibër Lepenci” e cila menaxhon këtë digë, në vitin 2023 ka siguruar të hyra në vlerë prej 10 milionë euro. Rritje të lartë ka pasur edhe prodhimi i energjisë elektrike nga Hidrocentrali që gjatë vitit 2023 ka shënuar rekord e janë prodhuar 146 mijë megavatëorë energji elektrike, që shënon rritje prej 95% prej vitit paraprak.  Përgjatë vizitës takuam edhe patrollën e policisë tek diga e vogël kompensuese, një patrollë profesionale e multi-etnike që me zell e përkushtim po punojnë për sigurinë e të gjithë qytetarëve”, shtoi Rizvanolli./Arbresh.info/