Gjykata e Apelit e Kosovës, duke vendosur ne bazë të ankesave te palëve, ka ulur dënimet për një grup të akuzuarish, në të ashtuquajturin rasti “Rolex”.

Kështu  të akuzuarin A.S., i cili nga gjykata e shkallës se parë ishte dënuar me 12 vjet burgim dhe 12 mijë e 500 euro gjobë, për veprën penale  krim i organizuar, lidhur me veprën penale të grabitjes, nga, Apeli e gjykoi me 8 vjet burgim dhe 8 mijë euro gjobë.  Të akuzuarit G.A. dhe Rr.A.  dhe E.G., të dënuar secili veç e veç nga Gjykata Themelore, për të njëjtat vepra, me nga 11 vjet burgim dhe 12 mijë e 500 uro gjobë, Gjykata e Apelit i dënoi me nga 7 vjet burgim dhe nga  7 mijë euro gjobë.

Ndërsa të akuzuarin H.G., i cili ishte gjetur fajtor për veprën penale mbajtje në pronësi, kontroll dhe posedim të paautorizuar të armeve, për te cilën vepër  ishte dënuar me 3 vjet burgim, kjo Gjykatë e dënoi me 2 vjet burgim”, thuhet në një komunikatë lëshuar nga Gjykata e Apelit.

Kolegji penal prej tre anëtaresh kësaj gjykate, gjeti se gjykata e shkallës se parë ka vërtetuar drejt  gjendjen faktike dhe  ka aplikuar drejt ligjin penal , kur të akuzuarit i ka shpallur fajtor, për veprat e lartcekura.

Ndërsa sa i përket vendimit mbi dënim, kolegji vlerësoi  se vlerësimi i rrethanave renduese dhe lehtësuese, lidhur me peshën e veprës penale, shkallën e përgjegjësisë penale, gjendjen personale dhe ekonomike, nuk është bërë si duhet.