Ministria e Industrisë, Ndërmarrësisë dhe Tregtisë (MINT), përmes Inspektoratit Qendror të Mbikëqyrjes së Tregut, ka intensifikuar inspektimet në sektorin e tregtimit të derivateve të naftës në të gjithë territorin e Kosovës.

Ky veprim vjen si pjesë e përpjekjeve për të garantuar mbrojtjen e konsumatorëve, rritjen e transparencës dhe mbrojtjen e konkurrencës së drejtë në treg, si dhe për të parandaluar çrregullimet e mundshme në çmimet dhe cilësinë e produkteve të naftës.

Gjatë kësaj jave dhe edhe sot, katër ekipe të Inspektoratit Qendror kanë qenë në terren duke kontrolluar operatorët ekonomik që merren me tregtimin e derivateve të naftës. Raporti përfundimtar i inspektimeve pritet të publikohet gjatë ditës së sotme.

Ministria u bën thirrje qytetarëve që të raportojnë çdo parregullsi apo mashtrim të mundshëm përmes kanaleve zyrtare të komunikimit:  Numri pa pagesë: 0800 11000 Email: [email protected]

“Jemi të përkushtuar në garantimin e një tregu të drejtë dhe të sigurt për të gjithë qytetarët,” thuhet në njoftimin e MINT./Arbresh.info