Nëse nuk gjendet zgjidhja për krijimin e institucioneve të reja të Kosovës, atëherë deputetët do të duhej t’i drejtohen Gjykatës Kushtetuese për daljen e vendit nga kriza e mos krijimit të institucioneve, ka thënë njohësi i çështjeve kushtetuese Mazllum Baraliu.

Ai në një prononcim për Indeksonline, ka pohuar se me bllokadën e krijuar, Kosova ka humbur shumë në fushën kapitale duke humbur mbështetjen e Fondit Monetar Ndërkombëtarë dhe Bankës Botërore.

“Ky ngërç ka bllokuar në shumë aspekte institucionet e vendit në radhë rebalancimin e buxhetit të shtetit e shumë çështje tjera kapitale. Në mungesë të vendimmarrjes Kosova ka humbur nga Fondi Monetar Ndërkombëtarë e deri të Banka Evropiane dhe Banka Botërore”, ka thënë ai.

Për situatën e krijuar në vend, Baraliu ka thënë se përgjegjës janë gjitha subjektet politike në kuvend, e posaçërisht koalicioni i cili ka fituar të drejtën e krijimit të institucioneve, dhe bllokimin e pa qartë nga ana e tyre.

“Krijimi i Qeverisë nga PAN nuk mund të pritet deri në pa kufi gjithashtu është përgjegjësi e të gjithëve pa dallim të subjekteve politike në tersi për vakuumin e krijuar për interesa të ngushta të caktuara politike. Njëra prej zgjidhjeve me kushtetuese duke pasur parasysh urgjencën e krijimit të institucioneve nëse nuk ka ndonjë reflektim nga subjektet politike, atëherë deputetët do të duhet që t’i drejtohen Gjykatës Kushtetuese për zgjidhje, ka thënë Baraliu.