Qeveria gjermane i jep mbështetje Kosovës në programin “Gazetarët në Rezidencë –Kosova”

18:07 | 23 Nëntor 2022

Sharr Jakupi, shefi i kabinetit të ministres së Jashtme dhe Diasporës, Donika Gërvalla, dhe sekretari i Përgjithshëm i MPJD-së, Behar Isma, kanë pritur sot në takim një delegacion nga Gjermania, në përbërje të Mathias Kiesler, zëvendësambasador gjerman në Kosovë, Adham Hamed, udhëheqësi i sektorit për Mbrojtjen e Gazetarëve në Gjermani dhe Andres Lamn nga ECMPF (Qendra Evropiane për Liri të Shtypit dhe Medias).

Qëllimi i takimit ishte mbështetja e Qeverisë gjermane për programin “Gazetarët në Rezidencë –Kosova”, program ky i iniciuar dhe sponsorizuar nga Ministria e Punëve të Jashtme dhe Diasporës, i implementuar bashkë me AGK dhe ECMPF-në.

Përmes një komunikate për media bëhet e ditur se delegacioni ka përgëzuar Ministrinë për inicimin dhe implementimin e këtij projekti, duke thënë se një program unik si ky, dëshmon gatishmërinë e Kosovës për të mbështetur gazetarët dhe popullin ukrainas në këtë periudhë kaq të vështirë për ta.

Pikërisht për këtë arsye, ata kanë shprehur ndihmën e shtetit gjerman në ofrimin e burimeve njerëzore dhe rritjen e kapaciteteve financiare për programin.

“Gazetarët në Rezidencë –Kosova”, ka filluar që nga muaji prill i këtij viti, dhe deri tani 11 gazetarë ukrainas kanë ardhur në Kosovë, nga ku vazhdojnë punën e tyre në mediat ukrainase.

Jakupi është shprehur i lumtur që Republika e Kosovës ka arritur të japë kontributin e saj për popullin e Ukrainës edhe përmes këtij programi e edhe nismave tjera, përfshirë ndihmat humanitare dhe pezullimin e regjimit të vizave për shtetasit ukrainas.

Jakupi ka falënderuar delegacionin gjerman që tashmë ka bashkuar forcat me AGK-në për ta ndihmuar dhe forcuar edhe më tej këtë projekt.

Pjesë e takimit ishin edhe kryetari i AGK-së së Kosovës, Xhemajl Rexha, dhe Flutura Kusari nga ECMPF, të cilët përveç se e informuan delegacionin gjerman për suksesin e këtij programi, kanë thënë se Republika e Kosovës ka shkruar histori, duke u renditur si shteti i parë që ka shprehur gatishmërinë për të ndihmuar gazetarët ukrainas./arbresh.info/