Avokati i Popullit, Naim Qelaj ka pritur sot në takim nënkyetarin e Komunës së Prishtinës, Shkëmb Manaj dhe drejtorin e Drejtorisë për Shërbime Publike në Komunën e Prishtinës, Bekim Brestovci, me të cilët u diskutua çështja e mbeturinave dhe nevoja e komunikimit institucional në funksion të zgjidhjes së kësaj problematike, e cila, për Avokatin e Popullit, është shumë shqetësuese sa i përket sigurisë dhe shëndetit publik të banorëve të kryeqytetit.

Përfaqësuesit e Komunës së Prishtinës e informuan Avokatin e Popullit me problemet të cilat, sipas tyre, e kanë sjellë në këtë pikë situaten me menagjimin e mbeturinave dhe veprimet të cilat i ka ndërmarrë Komuna për t’iu shmanguar gjendjes aktuale. Mbi të gjitha, ata theksuan problemet politike të cilat e kanë përshkuar situatën e menagjimit të mbeturinave, në vazhdimësi.

“Duke pohuar se zgjidhja e problemit të mbeturinave është në interes të vet Komunës së Prishtinës, zyrtarët komunalë treguan për masat e propozuara në funksion të zgjidhjes së kësaj situate, përfshirë këtu edhe ruajtjen nga cenimi i të drejtave të të punësuarve aktual në Kompaninë Rajonale ‘Pastrimi’. Ndërkohë, Avokati i Populit, z. Naim Qelaj, shprehu gatishmërinë e tij për ta ndërmjetësuar këtë situatë, ku pohoi se do t’i takojë edhe komunat tjera aksionare në Kompaninë “Pastrimi”, për të parë modalitet e zgjidhjes së problemit me mbeturina, në njërën anë, dhe garantimin e respektimin të të drejtave të të punësuarve, në anën tjetër”, thuhet në komunikatë./Arbresh.info/