Prokuroria Themelore në Prishtinë ka lëshuar aktvendim mbi ndalimin e të pandehurit Fitim Doda, për shkak të dyshimit se i njëjti është i përfshirë për veprën vrasje në tentativë që ka ndodhur më 26.03.2024 në rrugën “Haxhi Zeka” në Prishtinë.

Kështu ka bërë të ditur për Arbresh.info, zëdhënësja e kësaj prokurorie, Laureta Ulaj.

“Ju njoftojmë se më 24.04.2024, Prokurori i Shtetit ka lëshuar aktvendim mbi ndalimin e të pandehurit F.D., për shkak të veprave penale “Vrasje e rëndë” (në tentativë), “Mbajtja në pronësi, kontroll ose posedim të paautorizuar të armëve” dhe “Asgjësimi apo dëmtimi i pasurisë”, sipas KPRK-së. Ndaj të pandehurit, prokuroria ka kërkuar caktimin e masës së paraburgimit, në gjykatën kompetente”, ka thënë Ulaj.

Ndryshe, Policia e Kosovës ka shpallur në kërkim Fitim Dodën dhe Arijan Sijarinën si të dyshuar për vrasje në tentativë.

Plagosja me armë zjarri ka ndodhur më 26.03.2024, rreth orës 13:40, në rrugën “Haxhi Zeka”, në Prishtinë.

Duke u bazuar në të dhënat fillestare, një person ka mbetur i plagosur me armë zjarri.

Pas marrjes së informatës, policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave në zbardhjen e këtij rasti.

Hetuesit policor në koordinim me prokurorinë, po ndërmarrin veprimet hetimore për arrestimin e personave të dyshuar të cilët tashmë vetëm janë identifikuar, dhe po punojnë për ndriçimin e plotë të rastit./Arbresh.info/