Presidenti i Partisë Popullore Evropiane (EPP), Joseph Daul, me rastin e hyrjes në fuqi të Marrëveshjes së Stabilizim Asociimit, ka përgëzuar kryeministrin Isa Mustafa dhe Qeverinë e Kosovës.

Sipas Daul, MSA-ja do të forcojë procesin integrues të Kosovës në BE dhe do të shërbejë si një bazë e mirë për implementimin e reformave të tjera.

“Ne po festojmë sot së bashku me kryeministrin e Kosovës Mustafa dhe Qeverinë e tij hyrjen në fuqi të Marrëveshjes së Stabilizim Asociimit BE-Kosovë. Marrëveshja do të forcojë procesin integrues të Kosovës në BE dhe do të shërbejë si një bazë e mirë për implementimin e reformave të ardhshme”, thotë Joseph Daul, në urimin e tij në Twitter.

Partia Popullore Evropiane (EPP), është grupimi më i madh i partive të qendrës së djathtë në Evropë, anëtarë të së cilës janë edhe CDU-ja e Angela Merkel dhe të gjitha partitë tjera të qendrës së djathtë në vendet e BE-së.