Policia e Kosovës ka zhvilluar sot një operacion policor në Pejë ku kanë kontrolluar tri lokacione – barnatore, pasi ekzistonte dyshimi i arsyeshëm se në to ishin duke u shitur produkte farmaceutike pa banderola dhe të njëjtat produkte dyshohet se ishin sjellë kontrabandë dhe ishin të rrezikshme për jetën e qytetarëve.

Në njoftim thuhet se gjatë kontrollit në dy biznese nuk janë gjetur parregullsi, ndërsa në biznesin e tretë, në bagazhin e automjetit i cili ishte i parkuar para këtij biznesi, janë gjetur 22 lloje të barnave, gjithsej 561 paketime pa banderola, me prejardhje nga Turqi, transmeton Arbresh.info.

Një i dyshuari me inicialet M.B., 31-vjeçar është shoqëruar në zyrat e NJRHKEK-Pejë, dhe është intervistuar në prezencën e avokatit.

Ndaj të dyshuarit janë iniciuar rastet ’Prodhimi dhe shpërndarja e produkteve të dëmshme mjekësore’ dhe ‘Tregtia e ndaluar’

Operacion ka qenë i koordinuar se bashku edhe me Inspektorët Farmaceutik nga Ministria e Shëndetësisë./Arbresh.info