Me homazhe pranë varrezave të dëshmorëve, janë përkujtuar dëshmorët e anës së Kaçanikut të rënë 26 vite më parë në burgun e Dubravës, Avdylgafurr Luma, Danush Kurtaj, Mejdi Dalloshi, Tefik Raka, dhe Suad Brava.

Kryetari i Komunës Besim Ilazi me bashkëpunëtorë bëri homazhe në nderim të të rënëve për liri, ndërsa çmoi lartë veprën e tyre sublime për lirinë e atdheut.

“Pa sakrificën e dëshmorëve dhe të rënëve për atdhe edhe liria do të ishte e pa arritshme, ndërsa masakra e Burgut të Dubravës është një prej krimeve më të rënda të kryera ndaj shqiptarëve të Kosovës gjatë Luftës së Kosovës. “, tha  Ilazi.

Tek Varrezat e Dëshmorëve u vendosën kurora me lule nga institucionet komunale, familjarë të të rënëve si dhe nga OVL e UÇK-së.

Kjo ngjarje e rëndë, ndodhi në ambientet e Burgut të Dubravës, pranë qytetit të Istogut, gjatë datave 19 deri më 24 maj 1999.