PDK nuk nominon kandidat për kryetar derisa Thaçi të zgjidhet president

20:21 | 18 Janar 2016
M. A.

Partia Demokratike e Kosovës, nuk do ta nominoj asnjë kandidat për kryetar të partisë, për sa kohë që kreu i saj Hashim Thaçi nuk zgjidhet president i Kosovës. Këtë e ka bërë të ditur, Elemi Reçica anëtar i kryesisë së PDK-së.

Reçica ka thënë se fillimisht Kuvendi i Kosovës duhet të zgjedh Thaçin në krye të presidencës dhe vetëm atëherë PDK do të nominoj kandidatin për kreun e partisë më të madhe në vend.

“Ne si subjekt ende s’kemi bërë nominimin e ndonjë kandidati për kryetar të PDK-së, pasi njëherë duhet të zgjidhet presidenti i cili do të jetë Hashim Thaçi,” ka thënë Reçica.

Deputeti i PDK-së thotë se kryeministër i vendit do të vazhdoj të jetë Isa Mustafa deri në përfundim të mandatit.

“Brenda afateve ligjore do të zgjedhet presidenti dhe pas kësaj do të zgjedhet kryetari kurse sa i përket kryeministrit deri në vitin 2018 do të jetë Isa Mustafa sepse jemi shumë komod me koalicionin veç nëse Isa mustafa jep dorëheqje vetë,” kështu ka thënë ai për Gazetën Tribuna.

Ndërkaq, ish kryediplomati i Kosovës, Enver Hoxhaj para tri dite ka thënë se brenda 24 orë PDK-ja do të dal me qëndrim për nominimin e Hashim Thaçit për President.

Sipas tij, vetëm Thaçi është emër i propozuar dhe nuk ka tjetër.