Kryetari i Lëvizjes Vetëvendosje, Albin Kurti, në mbledhjen e Këshillit të Përgjithshëm të partisë, ka deklaruar se situata aktuale në vend nuk paraqet krizë institucionale, por një vakum kushtetues.

Sipas tij, përgjegjësia për formimin e Kuvendit nuk i takon vetëm subjektit fitues, por është një proces i përbashkët ku përfshihen edhe partitë e tjera parlamentare, përfshirë edhe përfaqësuesit e komuniteteve pakicë.

Në lidhje me letrën që i kishte dërguar LDK-së për të formuar koalicion dhe që ishte refuzuar, ai komentoi shkurt:

“Për ta ndihmuar daljen nga kjo bllokadë siç e dini i ftova kryetarët e partive PDK-së e LDK-së, por ky i dyti refuzoi të vijë, ndonëse disa deputetë të LDK-së thanë se duhet të ketë marrëveshje politike. Për këtë e shkrova edhe një letër tjetër për koalicion LVV-LDK, por edhe ajo u refuzua. LDK më 2020 bëri koalicion me ne, tash pas reformave do të duhej ta kishte më të lehtë. Ndoshta rruga e re ka preferenca tjera. Ne duam qeveri normale jo të përkohshme e as të tranzicionit e as të opozitës. Dorën në zemër ky togfjalëshi është paradoksal, sepse opozita është opozitë se duhet të jete opozitë e qeverisë”, ka thënë Kurti.