Pas ankesave për zhurmë, Policia dhe Inspekcioni nga nesër në aksion nëpër lokalet e natës

17:43 | 22 Korrik 2021

Drejtoria e Inspekcionit së bashku me Policinë dhe Njësinë Speciale të Kosovës nga nesër me aksion të gjerë në lokalet e qytetit.

Pas shqetësimeve dhe ankesave të vazhdueshme të qytetarëve për zhurmën që po shkaktojnë lokalet e qytetit, dhe parregullsitë e tjera në ushtrimin e veprimtarisë së tyre, kryetari i komunës, Agim Bahtiri, sot ka ftuar në takim përfaqësuesit nga Stacioni Jugor i Policisë në Mitrovicë, si dhe zyrtarë komunal nga Drejtoria e Inspekcionit, shkruan arbresh.info.

“Qëllimi i këtij takimi ishte gjetja e një zgjidhje të përbashkët mes institucioneve relevante lidhur me zhurmën që po shkaktohet nga lokalet e natës që ndodhen në përdhese të banesave kolektive, zhurma e të cilëve është kthyer në burim shqetësues për qetësinë e qytetarëve, si dhe parregullësitë e tjera në ushtrimin e veprimtarisë së tyre”, thuhet në njoftim.

Pas diskutimeve të shumta nga të pranishmit në takim, është marrë vendim i përbashkët që nga nesër në ora 20:00, Drejtoria e Inspekcionit së bashku me Policinë e Stacionit Jugor në Mitrovicë dhe Njësinë Speciale të Kosovës, të mbajnë aksion të gjerë për kontrollimin e lokaleve, në mënyrë që t’iu përmbahen rregullave në bazë të veprimtarisë për të cilat kanë marrë leje.

Me këtë rast, luten pronarët e bizneseve, qytetarët si dhe konsumatorët të kenë mirëkuptim dhe bashkëpunim me institucionet e lartpërmendura.

Kryetari Bahtiri ka theksuar se në vazhdimësi është i përkushtuar që t’iu ofroj mundësi bizneseve, mirëpo jo që këto biznese t’i shqetësojnë qytetarët dhe mërgimtarët tanë./arbresh.info/

Shpërndaje në rrjete sociale

Lajmet më të lexuara