Nesër parashihet një mot relativisht i mirë dhe me intervale të gjata me diell.

Siç thuhet në njoftimin e IHMK-së, temperaturat minimale do të lëvizin rreth zeros deri në 7 gradë Celsius, ndërsa maksimalet e ditës do të jenë tipike pranverore, duke lëvizur në kufijtë 10-20 gradë Celsius.

Njoftimi i plotë:

Parashikimi i motit për pesë ditë (04 – 08 prill 2022)
Pas reshjeve të ditëve të fundit që përfshijnë vendin tonë, situata sinoptike do të stabilizohet. Reshjet do të vazhdojnë edhe gjatë pjesë së dytë të ditës së diele (03.04.2022). Më tej parashihet që ky ciklon të dobësohet për të vazhduar tutje me mot relativisht të mirë dhe me intervale të gjata me diell. Riga të dobëta mund të ketë gjatë javës, si pasojë e zhvillimit të vranësirave lokale, por reshje siç patëm ditëve të fundit, nuk parashihen. Të hënën në orët e para të ditës parashihen ngrica të dobëta të cilat mund të jenë të dëmshme për disa lloje të pemëve të cilat vetëm se janë në fazën e lulëzimit.
Temperaturat minimale do të lëvizin rreth zeros deri në 7 gradë Celsius, ndërsa maksimalet e ditës do të jenë tipike pranverore, duke lëvizur në kufijtë 10-20 gradë Celsius.
Do të fryjë erë e lehtë deri mesatare nga drejtimet e ndryshme./arbresh.info/