Ish-presidenti i Kosovës dhe kryetari i AKR-së, Z.Behgjet Pacolli ka kujtuar ndërhyrjen e NATO-s për çlirimin e Kosovës duke thënë se “ne duhet t’i jemi mirënjohës gjithë jetën tonë,  miqve tanë perëndimorë”, shkruan Pacolli në llogarinë e tij në Facebook./Arbresh.info

Postimi i plotë:

Pardje ndërsa reagoja për masakrën në Bruksel, përmendja se në kryeqytetin e Belgjikës ku jetojnë dhe shumë bashkatdhetarë tanë, është selia e NATO-s. E pra sot të dashur miq, mbushen 17 vjet nga fillimi i bombardimeve të Aleancës Veriatlantike, NATO për çlirimin e Kosovës. Serbia kishte nisur shumë më herët spastrimin etnik sipas Planit Patkoi, spastrim që u ndal prej bombardimit të NATO-s. Kjo Aleancë shtetesh të perëndimit e prirë nga SHBA, vendosi fatin e Kosovës duke e shpëtuar popullin tonë nga zhdukja. Fillimi i bombardimeve në 24 mars 1999 dhe në përgjithësi aksioni i mëtutjeshëm i NATO-s, garantoi lirinë dhe pavarësinë tonë, duke zbuar jashtë territorit ushtrinë pushtuese serbe.

Ky fakt historik nuk duhet harruar kurrë dhe i duhet mësuar brezave të rinj për jetë të jetëve. Nuk ekziston asnjë predikim, asnjë rrenë e mëvonshme, asnjë teori konspirative, që të mund ta zhbëjë këtë të vërtetë të madhe! Ja pse ne duhet t’i jemi mirënjohës gjithë jetën tonë, sa të jetojë Kosova, miqve tanë perëndimorë!