Presidentja Vjosa Osmani ka pritur në takim ambasadorin e Turqisë në Kosovë, Sabri Tunç Angili, me të cilin diskutoi për, siç thuhet, marrëdhëniet e shkëlqyeshme dypalëshe dhe zhvillimet aktuale.

Në njoftimin për media, Osmani thuhet se ka shprehur mirënjohje të thellë për mbështetjen e vazhdueshme të Turqisë ndaj Kosovës, “si historikisht ashtu edhe gjatë mandatit të saj, veçanërisht në fushën e mbrojtjes dhe diplomacisë”.

Presidentja, sipas njoftimit, vlerësoi rolin e Turqisë në forcimin e kapaciteteve të FSK-së dhe në përkrahjen e Kosovës në procesin e njohjeve ndërkombëtare.

“Një falënderim i veçantë iu drejtua Presidentit Recep Tayyip Erdogan për përkushtimin e tij ndaj Kosovës, si dhe ambasadorit Angili dhe Ambasadës së Turqisë për angazhimin dhe mbështetjen e vazhdueshme”, thuhet në njoftimin e Presidencës.

Thuhet se të dy palët riafirmuan përkushtimin për forcimin e mëtejmë të partneritetit në funksion të paqes, stabilitetit dhe zhvillimit.

Në fund të takimit, u përmend edhe ndeshja e ardhshme kualifikuese për Botërorin 2026 ndërmjet Kosovës dhe Turqisë, me ç’rast u shpreh dëshira që kjo përballje të karakterizohet nga fryma sportive dhe respekti i ndërsjellë