Komisioni Evropian (KE) sot (e enjte) pritet ta publikojë raportin për liberalizimin e vizave me Kosovën, mirëpo ky raport ka gjasa të shtyhet për javën e ardhshme për shkak se më 28 dhe 29 qershor mbahet Këshilli i Ministrave, në të cilin zyrtarisht miratohen konkluzionet për Kosovën.

“Kosovës i është thënë se tanimë është çështje ditësh liberalizimi i vizave, gjithsesi para pushimit veror kur edhe Parlamenti Evropian shkon në pushim”, kanë thënë burime brenda Qeverisë së Kosovës për gazetën “Epoka e re”.

Ndërkaq të mërkurën ka qëndruar për vizitë në Prishtinë drejtoresha për Ballkanin Perëndimor në Drejtorinë e Përgjithshme për Fqinjësi dhe Negociata për Zgjerim në KE, Genoveva Ruiz-Calavera, e cila është takuar me kryeministrin Ramush Haradinaj.

Ajo pas takimit me Haradinajn ka shprehur optimizëm se liberalizimi i vizave për Kosovën do të jetë një realitet i shpejtë.