O’Connell përsëri kritikon opozitën për zhvillimet në vend

20:17 | 4 Janar 2016
M. A.

Ambasadori britanik në Kosovë, Ruairi O’Connell edhe një herë ka kritikuar opozitën për zhvillimet në vend.

Ai ka thënë se pamjet e vitit të kaluar të përdorimit të gazit lotsjellës në Kuvend, janë jo të mira për demokracinë.

“Pamjen e përdorimit të gazit lotsjellës është shqetësues dhe është kot. Kemi parë se Gjykata Kushtetuese mund të marrë vendime, sugjerime se çka do të thotë të jetë diçka në përputhje me kushtetutën. Nuk ka pasë nevojë të përdoret dhuna. Kemi parë se kjo është shumë e rrezikshme për demokracinë e Kosovës”, ka thënë O ‘Connell në një intervistë për RTK-në.

Ai ka kërkuar si nga opozita po ashtu edhe nga pozita t’i marrin përgjegjësitë që kanë dhe të punojnë.

“Le t’i marrin të gjithë përgjegjësitë për veprat e tyre. Nuk është i vetmi problem që ka Kosova. Kosova ka shumë sfida, krimin e organizuar, korrupsionin, situata e rëndë ekonomike por dhuna nuk ndihmon”, tha ai.

Ai ka kërkuar nga të gjitha palët të respektojnë vendimin e Kushtetueses.