Deputeti i Bundestagut, Thorsten Frei, e sheh mjaftë të vështirë mundësinë e formimit të qeverisë, duke mos përjashtuar edhe mundësinë e zgjedhjeve të reja.

“ Megjithatë, unë nuk i shikoj aktorët e ish-UÇK-së të kenë dalë më të fortë nga zgjedhjet. Përkundrazi. Aleanca e përbërë nga PDK, AAK dhe NISMA ka humbur dukshëm në krahasim me 2014. PDK-ja e vetme ndoshta do të përfundojë vetëm në forcën e tretë politike,” thotë Frei në një intervistë për DW.

Ai thotë se dialogu i vizave me Kosovën ka formuluar një rekomandim të qartë për liberalizimin e vizave, sapo të plotësohen edhe dy kushtet që kanë mbetur në Visa Road Map, transmeton arbresh.info.

“Veçanërisht ratifikimi i marrëveshjes së kufirit me Malin e Zi ende nuk është bërë, për shkak të gjendjes së paqartë politike të brendshme. Këtu do të jetë e detyrë e qeverisë së ardhshme në Prishtinë, që të organizojë një shumicë dhe që të japë një sinjal të qartë.”

Sa i përket raportimeve për një “Plan Marshall” të Gjermanisë për Ballkanin, Frei thotë se nuk ka njohuri, duke vlerësuar se vendet e Ballkanit Perëndimor – pikërisht Shqipëria, Maqedonia ose Kosova – të cilat sapo kanë dalë nga një krizë, kanë nevojë për impulse të reja, për më shumë mbështetje dhe ndihmë fillestare.

“Vazhdimi dhe intensifikimi i Procesit të Berlinit – pra një Berlin Plus – është mjeti i duhur. Megjithatë është e sigurtë që qeveritë përkatëse dhe aktorët politikë vendorë të bëjnë reformat e nevojshme. Këtu në radhë të parë ka rëndësi sundimi i ligjit. Kjo nuk mund të bëhet nga jashtë dhe nuk është çështje parash ose e një Plani Marshall.”

Frei shton se Gjermania qendron e pandryshuar si partnere në krah të të gjitha vendeve të rajonit dhe po ashtu është e gatshme të moderojë dhe të mbështesë edhe më shumë.

Derisa është pyetur për deklaratat për Shqipërinë e Madhe, ai thotë se nuk ka asnjë mirëkuptim për deklratat e tilla.

“Njerëzit duan përparim ekonomik. Me siguri që në një rast të tillë do të pritej e kundërta.”

Thorsten Frei është Deputet i Bundestagut Gjerman, i zgjedhur me votë të drejtpërdrejtë, dhe Nënkryetar i CDU-së për Landin Baden-Vyrttemberg. Ai është edhe anëtar i Grupit të Punës “Ballkan” në Bundestag. /arbresh.info/