Nesër bëhen 10 vjet nga vdekja e arkitektit të pavarësisë së Kosovës

21:22 | 20 Janar 2016
M. A.

Nesër, më 21 janar 2016, bëhen dhjetë vjet nga vdekja e presidentit të parë të Kosovës, Ibrahim Rugova. I cilësuar si arkitekt i pavarësisë së Kosovës, Rugova ishte një ndër themeluesit kryesor të Lidhjes Demokratike të Kosovës.

Si president i Kosovës, Rugova kishte shërbyer mes viteve 1992–2000 dhe përsëri në vitet 2002–2006. Ndër tjerash, Rugova njihej edhe si shkrimtar dhe intelektual i shquar.

Duke e pasur parasysh rolin e tij historik, Rugova ishte quajtur “Gandi i Ballkanit”, për t’u shpallur “Hero i Kosovës” pas vdekjes së tij.

Ibrahim Rugova vdiq me 21 janar 2006, ndërsa u varros me nderime te larta shtetërore dhe ushtarake. Funerali i Ibrahim Rugovës ishte njëri nga më të mëdhenjtë të historisë shqiptare.