Kandidatët e Lëvizjes Vetëvendosje kanë marrë më së shumti vota nga diaspora kosovare edhe në Vushtrri, Shtime dhe Kamenicë.

Gara për të parin e këtyre komunave do të vendoset në raundin e dytë më 14 nëntor, pasi asnjëri nga kandidatët nuk mori mbi 50 për qind.

Në Vushtrri, Arsim Rexhepi i Vetëvendosjes, i cili në zgjedhjet e 17 tetorit u rendit i treti me 26.03 për qind, mori 37 vota.

Dy kandidatët që do të përballen në balotazh, Xhafer Tahiri nga LDK dhe Ferit Idrizi PDK, nga diaspora kanë marrë 33, përkatësisht 10 vota.

Edhe në Kamenicë kandidati i Vetëvendosjes Kadri Rahimaj ka marrë më së shumti vota – 168, duke lënë mbrapa Qëndron Kastratin e PSD-së me 63. Të dy këta do të jenë në balotazh, pasi kanë marrë më së shumti vota në raundin e parë.

Ndërkaq, Jeton Biqkaj LDK dhe Muahmed Kallaba PDK kanë marrë nga 12 vota nga diaspora, Faton Jakupi AAK 10 vota, Albert Sermaxhaj NISMA – asnjë.

Qemajl Aliu nga Lëvizja Vetëvendosje për Shtime ka marrë 66 vota nga diaspora, duke lënë mbrapa Naim Ismailin e PDK-së me katër vota. Bedri Zeqiri i LDK-së, i cili nuk arriti të sigurojë balotazhin, ka marrë pesë vota.

Aliu prin edhe sipas rezultateve preliminare të KQZ-së për kryetar të Shtimes, me 45.10 për qind, para Naim Ismailit, kryetarit aktual, me 44.64 për qind.