Ekipi i arkeologëve të përbërë nga Shafi Gashi, Sali Islami dhe Arbnor Morina, kanë gjetur në numrin rrethues të kalasë së Vucakut një altar romak që daton në gjysmën e parë të shek.III, pas Krishtit.

Për këtë ngjarje me rëndësi kulturore ka shkruar ministri i Kulturës, Hajrulla Çeku,i cili, përmes rrjetit social ‘Facebook’ tha se “altari është i një rëndësie të veçantë dhe tregues se ka vazhdueshmëri jetese që nga parahistoria, antika deri në mesjetë”.

“Vetëm pak kohë pas fillimit të gërmimeve arkeologjike në Kalanë e Vuçakut në Drenas, tashmë kemi zbulimin e parë tejet të rëndësishëm. Ekipi i ekspertëve, i përbërë nga arkeologu Shafi Gashi, Sali Islami dhe Arbnor Morina, në murin rrethues të kalasë kanë zbuluar një altar romak të gjysmës së parë të shek.III, pas krishtit. Objekti është një spolie e ripërdorur në ndërtimin e kalasë së periudhës së Justinianit (527-565 p. Kr). Altari është i një rëndësie të veçantë dhe tregues se ka vazhdueshmëri jetese që nga parahistoria, antika deri në mesjetë”, ka shkruar Çeku.