Policia e Kosovës përmes raportit 24 orësh  ka njoftuar se dy persona janë ndaluar, për shkak të dyshimit se kanë qenë të përfshirë në sulme ekstreme të dhunshme me mjete shpërthyese, ndaj ushtarëve të KFOR-it, policisë dhe gazetarëve.

Në njoftim thuhet se dy të arrestuarit të nacionalitetit serb me vendim të prokurorit të Prokurorisë Speciale të Kosovës, janë dërguar në mbajtje për 48 orë.

“RREZIKIM I PERSONAVE NËN MBROJTJE NDËRKOMBËTARE & PJESMARRJE NË TURMË QË KRYEJNË VEPËR PENALE DHE HULIGANIZËM

Prishtinë 29.05.2023 – 18:30. Për shkak të dyshimit se kanë qenë të përfshirë në sulme ekstreme të dhunshme me mjete shpërthyese, ndaj ushtarëve të KFOR-it, policisë dhe gazetarëve, dy meshkuj K-Serb me vendim të prokurorit të Prokurorisë Speciale të Kosovës janë dërguar në mbajtje për 48 orë, përderisa të tjerët janë liruar në procedurë të rregullt. ​Lidhur me rastin janë duke u kryer hetime të mëtejme, nga njësitet relevante policore”, thuhet në njoftim.

Gjatë ditës së sotme Policia përmes një komunikate ka njoftuar se situata në Leposaviq, Zubin-Potok dhe në Zveçan aktualisht është e brishtë, por e qetë./Arbresh.info/