Kryeministri i Republikës së Kosovës, Isa Mustafa, ngushëlloi familjen Tali dhe të gjithë qytetarët e Kosovës pas ndarjes nga jeta të veprimtarit të shquar, Enver Tali.

Në telegramin e kryeministrit Isa Mustafa thuhet:

Me dhimbje dhe pikëllim morëm lajmin për ndarjen nga jeta të veprimtarit të shquar, intelektualit dhe patriotit, Enver Tali.

Enver Tali dha kontribut maksimal në të gjitha fazat e përpjekjeve të paepura të popullit të Kosovës për çlirim nga regjimi serbo-jugosllav dhe për krijimin e shtetit të pavarur e sovran të Kosovës.

Enver Talin nuk e ndalën as burgjet dhe torturat e regjimit dhe në çdo moment të jetës së tij punoi me përkushtim për Kosovën, si veprimtar politik, si përfaqësues diplomatik në sensibilizimin e çështjes së Kosovës si dhe duke ndihmuar luftën e armatosur për çlirimin e vendit.

Populli dhe institucionet e Republikës së Kosovës do ta përkujtojnë përgjithmonë veprimtarinë dhe kontributin e çmuar të Enver Talit për lirinë, pavarësinë dhe demokracinë në Kosovë.

I qoftë i lehtë dheu i Kosovës!

Isa Mustafa,

Kryeministër i Republikës së Kosovës