Ministri në detyrë i Financave, Hekuran Murati ka reaguar ndaj deklaratës së ish-kryeministrit Isa Musta, pasi ky i fundit tha se në prag të certifikimit të zgjedhjeve në vitin 2017, liroi nga detyra ministrat që u zgjodhën deputetë për të shmangur shkeljen e Kushtetutës.

Sipas Muratit, Qeveria Mustafa ishte shkarkuar me mocion mosbesimi aso kohe teksa shprehet se ky mocion ishte mbështetur edhe nga partneri i atëhershëm i koalicionit, PDK, shkruan Arbresh.info.

“Të gjendur përballë kësaj situate e të tradhtuar nga partneri i koalicionit, në LDK asokohe ishte diskutuar nëse të gjithë ministrat e LDK-së duhej të tërhiqeshin nga postet qeveritare, menjëherë pas mocionit. Në një situatë të ngjashme, kur LDK kishte dalë nga Qeveria në vitin 2010 pas dorëheqjes së Presidentit Sejdiu, partia ishte akuzuar se kishte braktisur institucionet”, ka shkruar Murati në llogarinë e tij në Facebook.

LEXO EDHE:

Mustafa kritikon qeverinë në detyrë: Kushtetuta nuk lejon dy poste, mospërfillja sjell përgjegjësi ligjore

“Duke e marrë parasysh reagimin e publikut në situatën e vitit 2010, LDK kësaj radhe kishte vendosur që ministrat të qëndrojnë nëpër pozita deri në përfundim të zgjedhjeve – që të mos akuzoheshin për braktisje të institucioneve. Pas zgjedhjeve të mbajtura me 11 qershor 2017, koalicioni PAN kishte dalë i pari, Lëvizja Vetëvendsoje e dyta, ndërsa LDK e treta. Pra as që pritej se LDK do të ishte edhe në qeverinë e ardhshme pas zgjedhjeve, prandaj kishte pasuar edhe lirimi i zyrave. Kjo ka qenë arsyeja pse ministrat e LDK-së kishin liruar zyret, sepse ishin të shkarkuar nga Kuvendi, dhe nuk pritej që do të vazhdonin në qeverinë e ardhshme. Jo për shkak të nenit 72 të Kushtetutës”, tha Murati./Arbresh.info