Zjarri i cili ka përfshirë një pjesë të Prevallës është duke vazhduar edhe të martën, më 13.08.2024.

Ministria e Punëve të Brendshme, ka njoftuar se aktualisht janë në operacione për fikjen e zjarrit.

MPB bën të ditur se banorët në Prevallë janë jashtë rrezikut për jetë, dhe gjithashtu nuk ka rrezik për pasuri të banorëve.

Tutje, bëhet e ditur se prezent në këtë operacion janë Policia e Kosovës, pjesëtaret nga parku nacional në Prevallë etj.

Njoftimi i plotë:

Ministria e Punëve të Brendshme respektivisht Agjencia për Menaxhimin Emergjent, njofton të gjithë qytetarët se në situatën e krijuar nga zjarri në sipërfaqe të hapur në parkun nacional në Prevallë, aktualisht janë në operacione për fikjen e zjarrit nga toka përveç Njësisë së Zjarrëfikjes dhe Shpëtimit nga Prizreni , edhe Njësitë e Zjarrëfikjes dhe Shpëtimit nga Gjakova, Prishtina dhe Ferizaj.

Gjithashtu MPB/AME ju njofton se rrezik për jetë dhe pasuri të banorëve në Prevallë nuk ka, deri sa përpjekjet për ta mbajtur nën kontroll dhe të lokalizuar zjarrin vazhdojnë nga kapacitetet e komunës së Prizrenit me Komunat në ndihmë.

Prezent në operacion në mbështetje janë edhe Policia e Kosovës, pjesëtaret nga parku nacional Prevallë, Shërbimi Emergjent Mjekësorë nga Prizreni etj.

Nga afër situata koordinohet nga zëvendësministri i MPB-së, z. Blerim Gashani, zëvendës drejtori i AME-së, z. Shefki Abdullahu me staf nga AME, në koordinim të vazhdueshëm me Qendrën Operative Emergjente 112./Arbresh.info/