Motra e njërit nga të dënuarit me burg të përjetshëm në rastin “Kumanova”, Demë Shehu që njihet si komandant Juniku ka thënë se vëllai i tij është akuzuar për një krim që nuk e ka bërë.

“Qysh dënohet njeri me aktakuzë terrorizmi, ai nuk është terrorist, ai është çlirimtar me të gjithë shokët e tij dhe duam lirimin e tij sa më parë”, ka thënë ajo për arbresh.info.

Gjithashtu Selvije Shehu është shprehur se arsyeja pse kanë shkuar tek Ambasada e Maqedonisë, është për t’ju treguar se deri në fund do të kërkojnë drejtësi. Shehu ka bërë të ditur se protestat do të vazhdojnë.

Gjykata Penale e Shkupit dje ka dënuar më 746 vjet burg grupin e ashtuquajtur “Kumanova”, ku nga 29 persona sa ishin në këtë grup shtatë pjesëtarëve  u është shqiptuar burgim i përjetshëm, katër janë liruar nga aktakuza.

Pjesëtarët e grupit “Kumanova”, janë dënuar  pasi që Gjykata ka dhënë verdiktin e saj që të njëjtit janë përfshirë në luftimin e “Lagjes së Trimave” në Kumanovë më 9 dhe 10 maj të vitit 2015 e që sipas Kodit Penal të Maqedonisë janë ngarkuar me veprën penale organizim terrorist.

Përfaqësues politikë në Maqedoni po kërkojnë hetim ndërkombëtar për këtë çështje, përfshirë Kosovën dhe Shqipërinë./arbresh.info/