Janë bërë 5 muaj që kur janë ndërprerë punimet në rrugën magjistrale Suharekë- Prizren.

Kompania, e cila ishte duke i kryer punimet, kishte dëmtuar gypin, i cili e furnizon qytetin me ujë të pijes, raporton KTV.

Kompania ka fajësuar Komunën dhe Ministrinë për këtë, duke thënë se këto dy institucione nuk e kishin vënë në dijeni të ekzistencës së tij. Për këtë, kompania kishte ndalë punimet, duke refuzuar t’i mbulojë shpenzimet e gypit.

Por, asnjëri institucion nuk e merr përgjegjësinë për këtë. Në kohën kur projekti është realizuar, edhe komuna e Suharekës dhe Ministria e Infrastrukturës, janë udhëhequr nga LDK-ja.

Tash ky projekt po i kushton Ministrisë rreth 120 mijë euro më shumë.

Për këtë pauzë të punimeve ankohen banorët e fshatit Shirokë dhe qytetarët, të cilët u duhet ta frekuentojnë çdo ditë këtë rrugë.

Afër vendit ku janë zhvilluar punimet është edhe qendra industriale, në të cilën operojnë rreth 60 biznese.

Komuna e Suharekës thotë se vazhdimisht e ka shtruar me zhavorr këtë rrugë, për ta bërë më të qarkullueshme./KTV