Ministria e Financave, Punëve dhe Transfereve ka reaguar ndaj kërkesës së Avokatit të Popullit për ndryshimin e Ligjit për Tatimin në Pronë.

Përmes një postimi në Facebook, ministria njofton se kushtëzimi për të nxjerrur vërtetimin e shlyerjes së borxhit të Tatimit në Pronë për të regjistruar veturën është hequr qysh në vitin 2021, shkruan Arbresh.info.

“Ministria e Financave, Punës dhe Transfereve njofton se kushtëzimi për të nxjerrur vërtetimin e shlyerjes së borxhit të Tatimit në Pronë për të regjistruar veturën është hequr qysh në vitin 2021, bazuar në Rregulloren mbi Pezullimin e Shërbimeve Komunale për Mbledhjen e Detyrimeve të Papaguara të Tatimit në Pronë, e miratuar nga Qeveria e Republikës së Kosovës në tetor të vitit 2021.”, ka njoftuar Ministria.

“Për më tepër, me hyrjen në fuqi të Ligjit Nr. 08/L-176 për Ndryshimin dhe Plotësimin e Ligjeve që Përmbajnë Procedura të Veçanta Administrative dhe Harmonizimin e Tyre me Ligjin Nr. 05/L-031 për Procedurën e Përgjithshme Administrative, përmes nenit 111 ka fshirë nenin 29 të Ligjit për Tatimin në Pronë.”, thuhet tutje.

Sipas Ministrisë, rekomandimi i Avokatit të Popullit lidhur me ndryshimin dhe plotësimin e këtij ligji është adresuar kohë më parë nga Ministria./Arbresh.info