Mëngjesin e sotëm, sikurse edhe të premten, mijëra qytetarë të Kosovës ia kanë mësyrë Shqipërisë për të kaluar fundjavën.

Mbi 13 mijë kosovarë, të premten e kanë kaluar kufirin Vërmicë-Morinë, për të kaluar fundjavën në shtetin shqiptar, shumica prej tyre pranë bregdetit.

Shkuarjes masive të qytetarëve të Kosovës për fundjavë në Shqipëri kanë ndikuar edhe masat e reja shtrënguese që Qeveria Kurti vendosi kundër pandemisë Covid-19.

Sipas Qendrës për Menaxhimin e Kufijve, në Vërmicë mëngjesin e së shtunës janë krijuar kolona deri në 400 metra, teksa pritjet janë shtuar deri në 30 minuta për të kaluar në anën e Shqipërisë.

Për ata që duan të kalojnë kufirin me Shqipërinë ose anasjelltas, aktualisht nuk ka ndonjë masë ndaluese apo kërkesë për tu pajisur me test negativ PCR.

Shqipëria javëve të fundit ka shënuar rënie të vdekjeve dhe rasteve të reja si pasojë e COVID-19 derisa në Kosovë ato janë rritur dukshëm. /Telegrafi/