Të dhënat preliminare në baza mujore të Agjencisë së Statistikave të Kosovës (ASK) bëjnë të ditur se në muajin shkurt 2025 në Kosovë dhe jashtë saj u lindën mbi 1,900 foshnje.

“Në muajin shkurt 2025 janë regjistruar 1,955 lindje (brenda dhe jashtë Kosovës). Prej këtyre lindjeve të regjistruara, 1,024 lindje janë meshkuj dhe 931 lindje janë femra.” – thuhet në komunikatën e ASK-së.

Ndërsa, janë regjistruar gjithsej 965 raste të vdekjeve (brenda dhe jashtë Kosovës). Prej vdekjeve të regjistruara, 535 janë meshkuj dhe 430 janë femra.

Këto të dhëna publikohen duke u bazuar në të dhëna administrative. Sipas Dispozitave ligjore mbi udhëheqjen e Regjistrave themeltarë për lindjet, vdekjet, kurorëzimet dhe shkurorëzimet, rastet regjistrohen në mënyrë të obligueshme në Regjistrat e lartcekur, në vendin ku ka ndodhur ngjarja, pa marrë parasysh se personat me të cilët lidhet ngjarja, vendbanimin e përhershëm e kanë në atë vend, ose në ndonjë vend tjetër.

Tutje, ASK thotë se do të vazhdojë me grumbullimin e të dhënave përmes Pyetësorëve të veçantë statistikorë, për Lindjet DEM-1, Vdekjet DEM-2, Kurorëzimet DEM-3 dhe Shkurorëzimet SHK-1, sikurse deri më tani. Grumbullimi i të dhënave vazhdon të bëhet çdo muaj dhe do të shërbejë për krijimin e bazës së të dhënave, si dhe krahasimin me të dhënat administrative. Burimi i të dhënave të këtij publikimi është Agjencia e Regjistrit Civil të Kosovës (ARC).