Zëvendëskryeministri i Kosovës, Fatmir Limaj, ka folur për raportet mes Kosovës dhe aleatëve të saj perëndimorë.

Limaj ka deklaruar në televizionin T7, se Kosova “s’e ka luksin të zgjedhë” mes Shteteve të Bashkuara të Amerikës dhe Gjermanisë.

Deklarata e tij vjen pas një nervoze të shfaqur nga presidenti i vendit ndaj Gjermanisë, e cila është e vendosur të mos e lejojë Hashim Thaçin ta realizojë idenë e tij për “korrigjimin e kufijve”.

Thaçi e ka minimizuar rolin ndërmjetës të Gjermanisë në bisedimet Kosovë-Serbi, duke këmbëngulur se pa Amerikën s’mund të arrihet asgjë.

Presidenti e ka shfaqur këtë qëndrim teksa Gjermania gjithashtu po tregohet më e ngrohtë karshi kundërshtarit të Thaçit, kryeministrit të vendit, Ramush Haradinaj, të cilin kancelarja gjermane, Angela Merkel, e ka ftuar për një takim sy më sy në Berlin.

Limaj ka thënë se nuk e di arsyen e nervozës që po shfaqet ndaj Berlinit zyrtar.

Ai ka deklaruar se “Gjermania është jashtëzakonisht e fokusuar të na gjejë zgjidhje”.