Deputeti i Aleancës për Ardhmërinë e Kosovës (AAK), Pal Lekaj, takimin e kryeministrin Albin Kurti me presidentin e Serbisë Aleksandar  Vuçiq e sheh si rutinë dhe aspak dobiprurëse për shtetin e Kosovës. Ai ka thënë se Kosovës i duhet një dialog përmbyllës me njohje reciproke.

“Po sa i përket takimeve të tilla, më shumë janë rutinë sesa që janë dobiprurëse për shtetin e Kosovës, për përmbylljen e bisedimeve dhe kjo po vazhdon me vite e sidomos në këtë Qeveri që me të vërtetë nuk i ka dhënë rëndësi të veçantë dialogut dhe tani po shihet se po ka takime të nivelit të ndryshme, po pa rezultate konkrete. Kosovës i duhet një dialog përmbyllës me njohje reciproke dhe pa ato takime kurtuazie”, tha Lekaj.

Sipas Lekajt, kryeministri Kurti ka thyer të gjitha parimet e Vetëvendosjes.

“Jo vetëm që i ka thyer por ka shkelur në parimet e VV-së. Ju e dini se ka qenë kauza “Jo Negociata, Vetëvendosje” dhe në këtë drejtim të gjitha parimet që i ka premtuar, i ka shkelur me dy këmbët dhe mendoj që nuk pritet shumë nga kjo Qeveri”, tha Lekaj./EO/