Sekretari i Jashtëm britanik, David Lammy, tha se shteti prej nga ai vjen do që Kosova e Serbia të kenë normalizim të qëndrueshëm e paqësor.

Në konferencën e përbashkët me presidenten Osmani, Sekretari i Jashtëm britanik tha se shpreson që qeveria e ardhshme do t’i adresojë nevojat e të gjithë qytetarëve, duke përfshirë progresin në integrimin e serbëve të Kosovës dhe angazhimin e fuqishëm në dialogun e udhëhequr nga BE-ja.

“Duam normalizim të qëndrueshëm e paqësor për ju këtu në Kosovë, mes Kosovës e Serbisë. Mbretëria e Bashkuar është padyshim kontribuues i madh në KFOR. E kam vizituar KFOR-in herën e fundit kur kam qenë këtu dhe do t’i vizitojë prapë. Është plotësisht qenësore për sigurinë tuaj dhe shpresoj që qeveria e ardhshme do t’i adresojë nevojat e të gjithë qytetarëve, duke përfshirë progresin në integrimin e serbëve të Kosovës dhe angazhimin e fuqishëm në dialogun e udhëhequr nga BE-ja. Pata kënaqësinë te jem me përfaqësuesin e lartë të BE-së para dy javësh në Londër e të diskutojmë Ballkanin Perëndimor dhe të diskutojmë Kosovën, dhe nismat e saj dhe pres që të punojmë me kolegët evropian në këtë kohë të sfidave e të luajmë rolin tonë të plotë përkrah Bashkimit Evropian për të siguruar që të kemi dialog, por edhe progres që funksionon për njerëzit, për popullin e Kosovës dhe Serbisë”, tha Lammy.

Tutje Sekretari i Jashtëm britanik tha se është e rëndësishme të shohin Kosovën të shënojë progres në udhëtimin e saj euroatlantik.

“Dhe me mbështetjen e Mbretërisë së Bashkuar shpresojmë që do të mund të anëtarësoheni në Këshillin e Evropës. Procesi i Berlinit është i rëndësishëm për t’i krijuar lidhjet brenda këtij rajoni dhe pjesës tjetër të Evropës dhe do të bëjnë çka është e mundur për ta mbështetur atë proces në muajt e ardhshëm”, vijoi tutje ai.

Zyrtari i lartë britanik tha se dhe ka punë të tjera që shtetet mund të bëjnë së bashku për ta luftuar krimin e organizuar. “Këto banda rrezikojnë rajonin dhe shoqërinë dhe e lënë shenja si një rajon më i pasigurt, duhet ta luftojmë këtë”, tha ai.

Tha se mirëpret progresin e arritur në procesin zgjedhor të shkurtit derisa tha se shpreson që në Kosovë do të vazhdohet me formimin e qeverisë së re, që sipas tij, është esenciale në këto momente, që britaniku i quajti sfiduese.

“Ky është një rajon që ka pasur rëndësi për britanikët, kishte rëndësi kur ka qenë Tony Blair, ka rëndësi edhe sot.

Tha se Mbretëria e Bashkuar po e udhëheqë Procesin e Berlinit në një kohë të vështirë.

“Nuk jam kthyer vetëm si mik, por plotësisht i bindur se Mbretëria e Bashkuar vazhdon të luaj një rol esencial si mik e partner kyçi këtij kombi të madh”, tha Lammy.