Disa përfaqësues të Bashkimit Europian dhe dy këshilltarët e Përfaqësuesit Special të BE-së, Miroslav Lajcak janë në Kosovë për t’u takuar me përfaqësuesit institucional dhe politik të Kosovës.

Ardhja e tyre në Kosovë në këtë kohë besohet të jetë për të diskutuar rreth dialogut Kosovë-Serbi.

Ndonëse, prezenca e tyre në vend nuk është bërë publike, burime të portalit arbresh.info brenda qeverisë thonë se ata janë duke mbajtur takime me përfaqësuesit e  institucioneve në vend.

Por zyrtarisht, një gjë të tillë nuk e konfirmon Qeveria e Kosovës.

E nga zyra e BE-së bëjnë të ditur se vazhdimisht  ka takime mes përfaqësuese të BE-së dhe Kosovës duke mos mohuar prezencën e tyre në Kosovë.

Zoï Muletier zyrtar për shtyp për fqinjësi dhe zgjerim dhe për politikën e jashtme dhe të sigurisë të BE-së në një përgjigje për arbresh.info nuk tregoj detaje të arsyes së ardhjes së tyre në Kosovë.

“Ndërveprimet me partnerët në rajon dhe në BE janë pjesë përbërëse e punës së përditshme të Përfaqësuesit Special dhe ekipit të tij dhe ne nuk ofrojmë detaje të drejtpërdrejta për ta”, tha ajo./arbresh.info/