Ky lokalitet arkeologjik po rrezikohet nga moti i ligë (Foto)

16:20 | 21 Janar 2016
M. A.

Vitin e kaluar në Sheshin e Lidhjes së Prizrenit ishte zbuluar një lokalitet arkeologjik. Kjo pjesë e trashëgimisë kulturore të këtij qyteti, po rrezikohet të dëmtohet nga moti i ligë.

Organizata jo-qeveritare Ec Ma Ndryshe, ka publikuar foto në facebook të këtij lokaliteti, duke bërë thirrje tek institucionet për ndërhyrje.

“Pas muajve të tërë që ka mbetur i hapur si dhe nënshtrimit ndaj kushteve të jashtme, sidomos motit të ftohtë të këtyre ditëve, ka ardhur deri te shpërthimi i gypave të ujit, duke mbuluar kështu pjesë të caktuara të lokalitetit”, thuhet në këtë reagim.

Sipas kësaj organizate, uji që ka mbuluar pjesën e lokalitetit mund të rrezikojë në masë të madhe qëndrueshmërinë e strukturave të gjetura.

“Ftojmë institucionet përgjegjëse që urgjentisht të ndërmarrin veprime për sanimin e dëmit të shkaktuar nga rrjedha e ujit, si dhe të ofrojnë mbrojtje fizike lokalitetit për të parandaluar raste të këtilla në të ardhmen”, shkruan Ec Ma Ndryshe.