Mbi 6 milion euro është buxheti i ndarë për zgjedhjet lokale 2017 që do të mbahen me 22 tetor.

Zëdhënësi i  Komisionit Qendror të Zgjedhjeve, Valmir Elezi, për “Arbresh.info” ka bërë të ditur se ky është buxheti i ndarë për këto zgjedhje, por se kostoja totale e zgjedhjeve mund të kuptohet vetëm pas përfundimit të procesit .

“Në ligjin e buxhetit për vitin 2017 të miratuar nga Kuvendi i Kosovës është paraparë edhe buxheti për zgjedhjet lokale që janë 6. 2 milion euro të planifikuara për këtë proces. Por se sa do të kushtojnë këto zgjedhje ne do të mund ta dimë vetëm pas përfundimit të këtij procesi zgjedhor”, u shpreh Elezi.

Në zgjedhjet lokale 2013, sipas Elezit,   prej gjithsej 38 komuna, në 25 prej tyre ka pasur raund të dytë, që kishte bërë që kostoja të jetë më e lartë.

“Duke u mbështetur në përvojën e proceseve të kaluara zgjedhore lokale, jo gjitha komunat kanë arritur që të përmbyllin procesin zgjedhor në raundin e parë, dhe në shumë prej tyre kemi pasur raund të dytë apo balotazh. Kostoja e zgjedhjeve lokale varet edhe nga ajo se sa komuna shkojnë në raund të dytë.

Elezi ka bërë të ditur se buxheti për zgjedhjet  lokale 2013  ishte  5 milion e 830 mijë euro./ Arbresh.info/Gita Lushi