Kryeministri i Republikës së Kosovës, Albin Kurti ka bërë të ditur të gjitha vendimet që u morën sot në mbledhjen e qeverisë.

Ai përmes një postimi në Facebook, tregon se në mbledhjen e stome u morën 24 vendime, ndërsa ka cekur disa më kryesore, përfshirë udhëzimin administrativ për rregullimin e çmimeve të produkteve të naftës dhe të karburanteve të ripërtërishme, si dhe rialokimin e 3 milionë euro për 25 projekte në komuna, shkruan arbresh.info.

“24 vendime në mbledhjen e 84-të. Për mbrojtje të konsumatorit dhe të konkurrencës, miratuam udhëzimin administrativ për rregullimin e çmimeve të produkteve të naftës dhe të karburanteve të ripërtërishme. Nafta do të ketë çmim tavan që varet nga mesatarja e furnizimit. Rialokuam 3 milionë euro për 25 projekte në komuna”, shkruan Kurti.

Po ashtu në kuadër të reformës së drejtësisë, ai shkruan se qeveria miratoi koncept-dokumentin për themelimin e Fondit të Konfiskimit.

“Miratuam edhe dhënien në shfrytëzim të pasurive të konfiskuara për nevoja të institucioneve. Për të avancuar e mbrojtur të drejtat e njeriut, nominuam përfaqësuesit e Qeverisë së Republikës së Kosovës në Këshillin Konsultativ për Komunitete. Për parandalimin e trafikimit me njerëz, miratuam Strategjinë Kombëtare kundër Trafikimit me Njerëz 2022-2026 dhe Planin e Veprimit 2022-2024. I hapëm udhë emërimit të Bordit të Fondit të Sigurimeve Shëndetësore, me shfuqizimin e vendimit paraprak”, shkruan Kurti.

Në këtë mbledhje, Qeveria e Kosovës miratoi edhe hartimin e Planit Hapësinor të Kosovës dhe Planit Hapësinor për Parkun Kombëtar “Sharri”, si dhe Planin e Veprimit të Strategjisë për Zhvillimin e Pylltarisë 2022-2030.

Qeveria për realizim të projekteve infrastrukturore të Ministrisë së Mbrojtjes, ka miratuar shpronësimin e pronave të paluajtshme brenda Lokacionit të Aeroportit të Gjakovës.

“Në frymën e thellimit të miqësisë sonë me partnerët ndërkombëtarë, miratuam Projektligjin për Ratifikimin e Traktatit mbi Ndihmën e Ndërsjellë Juridike në Çështjet Penale ndërmjet Republikës së Kosovës dhe Konfederatës Zvicerane. Për zgjerimin e bashkëpunimit për zhvillim ndërmjet Republikës së Kosovës dhe Dukatit të Madh të Luksemburgut, miratuam dy nisma, po ashtu, edhe dy të tjera për Programin IPA”, shkruan Kurti./arbresh.info/